28 të vdekur nga koronavirusi për pesë ditë
28 pacientë kanë vdekur në pesë ditët e fundit si pasojë e infektimit me koronavirus.
Instituti Kombëtar i Shëndetësisë Publike të Kosovës të martën ka publikuar të dhënat e fundit rreth situatës me COVID-19 në vend.
Në njoftimin e IKSHPK’së është bërë e ditur se në 24 orët e fundit janë raportuar 9 raste të vdekjes.
“Brenda 24 orëve janë raportuar 9 raste të vdekjes me SARS CoV-2 pozitiv. Rastet e vdekjes janë nga komunat: Prishtinë 2 raste (68, 67 vjeç), Drenas 1 rast (63 vjeç), Gjakovë 1 rast (66 vjeç), Kamenicë 1 rast (85 vjeç), Mitrovicë 1 rast (68 vjeç), Prizren 1 rast (59 vjeç), Suharekë 1 rast (61 vjeç), Vushtrri 1 rast (69 vjeç)”, ka bërë të ditur IKSHPK.
Nga fillimi i pandemisë e deri më tani, numri i të vdekurve si pasojë e koronavirusit ka shkuar në 1 mijë e 420 persona.
Nga marsi e deri më 19 janar të këtij viti, numri i të infektuarve me koronavirus ka shkuar në 56 mijë e 412.
Nga ta, janë shëruar 49 mijë e 713 persona, ndërkaq 5 mijë e 279 janë duke u përballur ende me koronavirusin.
Numri total i rasteve pozitive është 56.412 raste nga 211.689 persona të dyshimtë në virusin SARS-CoV-2 dhe 1.420 raste të vdekjes.
Gjatë 24 orëve të fundit, janë shëruar 281 pacientë derisa numri i përgjithshëm i të shëruarve deri më sot është gjithsej 49.713 raste, kurse numri i rasteve aktive është 5.279.
