Moti për javën e ardhshme, IHMK ka një këshillë për bujqit

Instituti Hidrometorologjik i Kosovës ka bërë të ditur se në dy ditët e para të javës që po hyjmë do të kemi mot me diell. Por sipas IHMK-së pjesa tjetër e javës do të karakterizohet edhe me riga shiu dhe shkarkime rrufesh.

“Do të mbajë mot me diell dhe vranësira të cilat në pjesën e dytë të ditës vende-vende mund të sjellin riga shiu dhe shkarkime rrufesh. Një javë kryesisht jo stabile sa i përket kushteve meteorologjike, përjashtuar ditën e enjte, ku parashihet mot më i qetë dhe më stabil”.

Temperaturat maksimale do të arrijnë mes 33-35 gradë Celsius kurse minimalet do të lëvizin nga 16-19 gradë Celsius.

“Sa i përket temperaturave , ato mbesin të larta kryesisht dy ditët e para të javës, ku maksimalet do të arrijnë deri 33-35 gradë Celsius, ndërsa nga dita e mërkurë do të ketë rënie të temperaturave , sidomos të atyre maksimale, derisa minimalet do të jenë më të larta krahasuar me ditët e fundit. Minimalet gjatë këtyre pesë ditëve do të lëvizin ndërmjet 16-19 gradë Celsius, ndërsa maksimalet e ditës parashihen të lëvizin ndërmjet 23-35 gradë Celsius. Do të fryjë erë kryesisht nga veriperëndimi e lehtë dhe lokalisht e fortë”.

Po ashtu meqë jemi në kohën e korrje shirjeve, IHMK ka edhe një thirrje për bujqit.

“Meqë ka filluar fushata e korrje shirjes, këshillohen bujqit (kombajnerët) që sa më shumë të shfrytëzojnë pjesën e parë të ditës, pasi që në pjesën e dytë shumë zona rrezikohen nga reshjet e shiut dhe formave tjera të reshjeve”, njofton IHMK.