Gjashtë të akuzuarit ngarkohen se keqpërdorën pozitën zyrtare, duke tejkaluar kompetencat e tyre në rastin e rrënimit të aneksit të “Abi Çarshia” në Prizren, ku pretendohet se dëmi i shkaktuar është 69 mijë e729 euro, raporton “Betimi për Drejtësi”.

Prokurori Mehdi Sefa deklaroi se në tërësi e mbështet ekspertizën e ekspertit Liman Mustafa dhe të gjitha provat që janë administruar në këtë shqyrtim gjyqësor.

Ndërsa mbrojtësi i të akuzuarit Islam Thaqi, avokati Blerim Mazreku dhe mbrojtësi i të akuzuarës Egzona Thaqi, avokat Valdet Hoxha dhanë vërejtje në ekspertizën e ekspertit të ndërtimtarisë Liman Mustafa.

Dy mbrojtësit thanë se kanë vërejtje lidhur me kualifikim profesional të ekspertit Liman Mustafa, pamundësisë së tij për t’i mbrojtur gjetjet e tij në gjykatë dhe se kjo ekspertizë nuk përmban emrin, numrin e protokollit të dokumenteve të shfrytëzuara për hartimin e kësaj ekspertize.

Përfaqësuesi i të dëmtuarës “ABI SHPK”, avokat Taulant Hodaj, propozoi që të administrohen prova të reja në këtë shqyrtim gjyqësor e të cilat prova nuk janë pjesë e aktakuzës por që ai konsideroi se janë shume relevante për këtë shqyrtim gjyqësor.

Në mesin e këtyre provave të reja janë: kërkesa e të dëmtuarit Irfan Fusha për legalizimin e pjesës ku është bërë tejkalimi i lejes i datës 18 korrik 2019, ankesa e ushtruar ndaj aktvendimit të Drejtorisë së Inspektoriatit të sektorit të ndërtimtarisë për rrënimin e objektit, certifikatën dhe vendimin për legalizimin e këtij objektit të datës 16 mars 21, me të cilën është bërë legalizimi i pjesës së ndërtimit që ka pasur tejkalim të lejes.

Po ashtu, si prova propozoi edhe vendimin e Gjykatës Themelore në Prizren me nr. C.nr 322/19 ku gjykata ka marrë aktvendim për sigurim të provave kundër Komunës së Prizrenit, me të cilën provë dëshmohet dëmi që i është bërë të dëmtuarit.

Tutje përfaqësuesi i palës së dëmtuar, propozoi disa CD, nga filmimet e TV Besa dhe Tv Prizren të datave 19 korrik dhe 21 korrik 2019 ku shihen gjithë të akuzuarit me rastin e daljes në terren për rrënimin e objektit aneks të ‘Abi Çarshia”.

Provë tjetër u propozua edhe një kërkesë për anulimin e vendimit me nr.A-213/18 të datës 27 shkurt 2018, që këtu i akuzuari Islam Thaqi e ka drejtuar ndaj Lumir Abdixhikut- Ish-ministër i Ministrisë së Infrastrukturës, me të cilën ka tentuar që ta vë në lajthitje ministrin e asaj kohe për anulimin e vendimit që të përmbahen nga çfarëdo rrënimi, e cila kërkesë nuk ishte marrë parasysh nga Administrata e Ministrisë së Infrastrukturës.

Edhe një e-mail që kryetari i Komunës së Prizrenit, Mytaher Haskuka ia ka drejtuar kryeministrit të Kosovës, Albin Kurti, u prezantua në mesin e provave të reja.

Përmes atij e-maili, Haskuka i ankohet Kryeministrit se ministri i tij nuk ka bërë anulimin e vendimit ashtu siç kishte kërkuar drejtori i asaj kohe Islam Thaqi. Ky vendim kishte obliguar të akuzuarit që të përmbahen nga çfarëdo rrënimi të aneks objektit të “ Abi Çarshia” dhe të respektojnë ligjin për legalizim.

Në fund, mbrojtësi i të akuzuarit Islam Thaqi, avokat Blerim Mazreku, kërkoi kohë për analizimin e këtyre provave dhe pastaj të deklarohet për rregullsinë dhe besueshmërinë e këtyre provave.

Kryetarja e trupit gjykues, Kymete Kicaj aprovoi kërkesën e mbrojtësit Blerim Mazreku.

Në këto kushte, seanca e sotme u ndërpre, ndërsa e radhës do të vazhdojë më 4 dhe 14 tetor 2021.

Ndryshe, Prokuroria Themelore në Prizren, më 20 dhjetor 2019, ka ngritur aktakuzë ndaj Islam Thaqi, Jetmire Venezi, Egzonë Morina-Thaqi, Arian Taraku dhe Isë Bislimaj, të cilët po i ngarkon me veprën penale “keqpërdorim i pozitës apo autoritetit zyrtar”.

Në aktakuzë thuhet se me 19 dhe 21 korrik 2019 në Prizren, në objektin “Abi Çarshia”, të akuzuarit Islam Thaqi, në cilësinë e drejtorit të Inspektoratit, Jetmire Verezi dhe Egzona Morina Thaqi, inspektore të ndërtimit, Arianit Taraku dhe Isë Bislimaj, zyrtarë në Drejtorinë e Inspektoratit, Shqipëron Krasniqi, përfaqësues ligjor në Komunën e Prizrenit, duke shfrytëzuar detyrën apo autoritetin zyrtar, i tejkalojnë kompetencat e tyre me qëllim të shkaktimit të dëmit ndaj “Abi” SHPK në Prizren.

Sipas aktakuzës, të akuzuarit realizojnë rrënimin e aneks-objektit të “Abi Çarshia”, duke e ditur se i dëmtuari ka dorëzuar aplikacionin për legalizim.

Prokuroria pretendon se të njëjtit kanë vepruar në kundërshtim me Ligjin për trajtimin e ndërtimeve pa leje, me Udhëzimin Administrativ nr.06/19, me Ligjin mbi procedurën e përgjithshme administrative, si dhe vendimet e Ministrisë së Mjedisit dhe Planifikimit Hapësinor, nr. A-213/18 dhe A-179/19, me të cilat ishin anuluar aktvendimet e Drejtorisë së Inspektoratit Komunal të Ndërtimtarisë në Prizren.

Sipas Prokurorisë, këto vendime obligojnë organet komunale në Prizren të veprojnë konform Ligjit për trajtimin e ndërtimeve pa leje, si dhe udhëzimeve administrative në fuqi, andaj sipas aktakuzës, të akuzuarit duke mos i përfillur këto vendime, veprojnë në kundërshtim me ligjet në fuqi.

Dëmi që pretendohet se i është shkaktuar “Abi Çarshia”, me rrënimin e ankesit në fjalë, është në vlerë prej 69 mijë e729 euro.

Me këto veprime, të gjithë të akuzuarit ngarkohen se kanë kryer veprën penale “keqpërdorim i pozitës apo autoritetit zyrtar”, nga neni 414 paragraf 2-1 lidhur me nenin 31 të Kodit Penal, vepër me të cilën kryesi dënohet me gjobë dhe me burgim prej tre deri në dhjetë vjet. /BetimipërDrejtësi

Shënim: Personat e përmendur në këtë artikull konsiderohet të pafajsheëm, përveç nëse nga gjykata vërtetohet se janë fajtorë me vendim të formës së prerë.

The post Gjykimi ndaj deputetes Vrenezi dhe të tjerëve, prezantohet një e-mail i Haskukës dërguar Kurtit appeared first on Prizreni Sot.