Historia nis 20 muaj më parë, kur Kuvendi Komunal në Prizren mori vendim për ndarjen e 130 mijë eurove për 26 transportues të kësaj komune pas situatës së krijuar me pandeminë COVID-19. Siç parashihte vendimi, 26 transportuesit do të përfitonin ndihmë nga 5 mijë euro.Iniciativa nisi nga disa asamblistë të Kuvendit Komunal të Prizrenit.

Ndër ta ishte edhe Islam Ukaj, ish-asamblist i Partisë Demokratike të Kosovës dhe ish-sekretar në shoqatën e transportuesve “Kosova e Lirë” në Prizren.Ukaj ishte në listën përfundimtare të atyre që përfituan subvencione nga Komuna.

Aktualisht, Islam Ukaj është emëruar drejtor i Inspektoratit në qeverisjen lokale që drejtohet nga Shaqir Totaj i PDK-së.

Janë të paktën tri kompani të transportit privat që po pretendojnë se drejtori i tanishëm i Inspektoratit në Komunën e Prizrenit, Islam Ukaj, i ka kushtëzuar ata duke iu thënë se, nëse dëshironi të jeni përfitues të subvencioneve, duhet që t’i japin 1 mijë e 500 euro nga shuma e përgjithshme, që ishte 5 mijë euro.

Këto 1 mijë e 500 euro, siç u kishte thënë operatorëve Islam Ukaj, do të ndaheshin për disa transportues të tjerë, të cilët kishin mbetur jashtë listës finale të përfituesve.Vetë Islam Ukaj nuk ka pranuar të përgjigjet mbi këto pretendime.Aktualisht, rasti i subvencioneve për transportuesit privatë të Prizrenit po hetohet nga Prokuroria e Shtetit ndërkohë ata që u dëmtuan nga ky proces thonë se do t’i ndjekin të gjitha rrugët ligjore për të marrë atë që u takon.

Njëri nga të pakënaqurit është Rexhep Elezkurtaj, pronar i kompanisë së transportuesve “Mir Tours” nga Prizreni.Ai ka rrëfyer se si Islam Ukaj kishte kërcënuar me heqje nga lista e përfituesve nëse nuk do t’i jepte 1 mijë e 500 euro nga totali që kishte dhënë Komuna për transportuesit privatë.

“Tha duhet me i dhënë 1 mijë e 500 euro, të lëshohen në xhirollogari 5,000 euro, ti tha duhet me i dhënë 1 mijë e 500 euro. Unë i thash, jo 1 mijë e 500 euro po unë nuk kam edhe 1 euro e gjysmë me t’i dhënë, se atëherë ishte pandemia, nuk kisha pare për bukë”, thotë Elezkurtaj.

“Më tha merre këtë konfirmimin e bankës, merre tha edhe shko më tha, unë tha të hoqa prej listës. I thash, kush je more ti me m’heqë prej listës? Më tha: unë jam ai që të kam shti në listë edhe të heq prej listës”, deklaron ai për KALLXO.com.Por, Rexhep Elezkurtaj nuk është i vetmi.Pronari i një kompanie tjetër thotë se anise ishte pjesë e listës së përfituesve u hoq nga ajo pasi nuk pranoi t’ia jepte 1 mijë e 500 euro Islam Ukajt.

“Jo, nuk i kemi marrë sepse është bërë një manipulim prej drejtoreshës dhe personit i cili është angazhuar për ndarjen e këtyre të hollave [Islam Ukaj], d.m.th. me vendim të komunës neve na është ndarë shuma 5000 euro, për 26 transportues”, thotë Vezir Hoxha, pronar i kompanisë “Zhur Tours”.

“Në atë listë kam qenë edhe unë mirëpo pastaj, jo kanë dalë më tepër transportues, jo diçka, është bë një mosmarrëveshje e cila ka ardhë deri te kjo që me na imponua neve që për me i marrë 5,000 euro është dashtë me i kthy 1 mijë e 500 euro”, deklaron Hoxha.Por, kishte edhe kompani të tjera të cilat nuk kanë pranuar që t’i japin nga 1 mijë e 500 euro nga shuma totale që e kishte ndarë Komuna për transportuesit privatë, e që ishte 5 mijë euro.

Përmes telefonit, ketë e kanë konfirmuar kompania “Lumi Tours” dhe “Hoqa Trans”.Qarkullimi i parave ‘cash’

Transportues të tjerë të cilët kishin pranuar që t’i ndajnë 1 mijë e 500 euro nga shuma totale prej 5 mijë euro i kanë dorëzuar ato tek Islam Ukaj. Dorëzimin e parave, siç e kanë konfirmuar vetë ata, e kanë bërë në dorë dhe jo përmes transaksioneve bankare.

Kërkesa për t’i paguar këto para ‘cash’ është sa problematike aq edhe joligjore. Sipas rregullave të Administratës Tatimore, asnjë pagesë mbi 500 euro nuk mund të bëhet në para të gatshme, pra ‘cash’, vetëm vlerat deri në 499 euro e 99 centë mund të kryhen në atë formë. Secila pagesë më e lartë se kaq duhet patjetër të bëhet përmes bankës, parasheh legjislacioni në fuqi.Sami Galluzaj, kryetar i Shoqatës së Transportuesve “Kosova e Lirë” në Prizren e ka konfirmuar se një shumë parash ia ka dorëzuar Islam Ukaj, i cili, siç ka thënë ai, i kishte mbledhur nga transportuesit që ishin përfitues të subvencioneve. Të gjitha paratë, sipas Galluzajt, Ukaj ia ka dorëzuar në zyrë ‘cash’.“E 21 mijë euro janë se janë mbledhë, kanë thënë pak si garancion se s’i kanë besu atij”, ka thënë ai.

“Mua m’i ka pru Islami 21 mijë euro, unë n’xhep i kam pasë o zotëri le të vijnë këta që s’i kanë marrë me mu se unë s’muj me ndryshu kurrgjë”, deklaron tutje Galluzaj gjatë një bisede.Sipas tij, transportuesit nuk kanë të drejtë t’i kërkojnë nga 5 mijë euro, siç e parashihte vendimi i Kuvendit Komunal, pasi, sipas tij, ishte një marrëveshje që të ndahen nga 1 mijë e 500 euro.Tutje, ai thotë se 10 mijë e 500 euro ia ka kthyer prapa Ukajt pasi nuk kishte arritur t’i shpërndante te transportuesit që kishin mbetur jashtë listës përfundimtare.Për rastin nuk ka pranuar të deklarohet kryetari i Komunës, Shaqir Totaj.

Por, një deklarim e ka dhënë zëdhënësja e Komunës, Jona Hoxhaj.Ajo tha se autoritetet komunale nuk janë në dijeni se drejtori aktual i Inspektoratit po hetohet nga Prokuroria e Shtetit. Ndërsa tha se ai aktualisht nuk mund të shkarkohet pa pasur një aktakuzë të konfirmuar nga gjykata.Për rastin ku ngritën dyshime për keqpërdorim të subvencioneve ka folur ish-drejtoresha e Financave në Komunën e Prizrenit në kohën kur ishin ndarë mjetet, Leonora Qerreti.

Ajo ka thënë që ky proces ishte përcjellë me probleme që nga fillimi.“Mangësia e këtij vendimi që të gjithë pajtohen mund të konsultoheni edhe me asamblistët që kanë qenë ka qenë thjesht shpejtësia që është marrë dhe analizë shumë e cekët që është bërë nuk ka pasur kritere prandaj ne kemi qenë të vetëdijshëm që ky vendim ka pasur mangësi, por kemi pasur dy zgjidhje, ose t’i ndihmojmë ata 26 operatorë siç e ka paraparë vendimi ose mos te ekzekutojmë”, ka thënë ajo.

“Roli jonë si drejtori ka qenë vetëm ndarja e mjeteve sipas vendimit që ka qenë i Asamblesë Komunale. Mjetet ka qenë plani të ndahen mjetet për 26 operatorë sepse në vendim ka qenë e specifikune, kriteret nuk kanë qenë në vendim çka ne si Drejtori kemi propozuar më pastaj në shtator që të përcaktohen kriteret por propozimi jonë nuk është pranuar dhe është kthyer prapa dhe nuk ka marrë aprovimin e kuvendarëve”, thotë tutje ajo.

Mohimi i pretendimeve nga Islam UkajDrejtori aktual i Inspektoratit, Islam Ukaj, nuk ka pranuar që të takohet për intervistë e të shpjegojë rastin për subvencionet. Ai ka preferuar që të përgjigjet përmes adresës elektronike.Ukaj e ka mohuar t’i ketë kushtëzuar transportuesit privatë të Prizrenit në këmbim të përfitimit të subvencioneve.

Sipas tij, ka qenë çështje vullneti e secilit që t’i ndajë nga 1 mijë e 500 euro për transportuesit e tjerë që kanë mbetur jashtë listës.“Unë ju siguroj se në rastin përkatës të gjithë kanë pasur vullnetin e mirë dhe solidar dhe askush nuk ka keqpërdorur mjetet e komunës, përkundrazi mjetet janë ndarë në përputhje me vendimin e Kuvendit të Komunës”, thotë Islam Ukaj.Tutje, ai përmend edhe një listë të pritjes por nuk ka ofruar qasje në listat e ndarjes së subvencioneve.

“Për këtë qëllim është nënshkruar edhe një deklaratë tek noteri. Në lidhje me këtë tre kompani të cilat me gjasë edhe e kanë raportuar këtë rast tek ju, nuk janë pajtuar që të ndihmojnë kompanitë e tjera dhe për këtë qëllim i kanë bartur nga lista primare e përfituesve në atë të pritjes, pasi që kanë konsideruar të gjithë se është e padrejtë të mos respektohet vendimi i shoqatës”, deklaron ai./KALLXO.COM

The post Subvencionet e dyshimta në Prizren appeared first on Prizreni Sot.

Ata tregojnë se në shoqata vazhdimisht është diskutuar për parregullsitë në procesin e shpërndarjes së granteve dhe subvencioneve, por asnjëri nga bujqit apo fermerët, nuk ka marrë guximin që padrejtësitë t’i paraqesin tek autoritetet kompetente, për shkak të frikës së humbjes së përfitimit.

As për Radion Evropa e Lirë, disa nga bujqit e kontaktuar, përfitues të granteve, nuk kanë pranuar të tregojnë historitë e tyre.

Vlera e ndarë për subvencione dhe grante nga Qeveria e Kosovës në pesë vjetët e fundit, sipas tyre, ka qenë rreth 50 milionë euro.

Ministria e Bujqësisë dhe Zhvillimit Rural, nuk ka dhënë ndonjë përgjigje për Radion Evropa e Lirë, lidhur me shumën e ndarë të subvencioneve dhe granteve apo ankesave eventuale të fermerëve apo bujqve.

Mema: “Lista e zezë” për fermerët

Ramadan Mema thotë se shumica e fermerëve janë përballur me kërkesa për ryshfet për sigurimin e skemave të subvencioneve të ndara për ta nga tatimpaguesit e Kosovës.

“Ka ekzistuar një frikë te shumica e përpunueseve që t’i bëjnë publike parregullsitë sepse kanë menduar se do të hyjnë në ‘lista të zeza’ jozyrtare, që në të ardhmen nuk do të kenë mundësi që të jenë përfitues të skemave të ndryshme të subvencioneve që i ka aplikuar Ministria e Bujqësisë. Përndryshe, mendoj se pjesa dërmuese e përfituesve të këtyre subvencioneve, secili mund të ketë një histori”, tha Mema.

Subvencionet janë fonde që qeveria ua merr taksapaguesve dhe ua jep grupeve të caktuara për t’i mbështetur bizneset e tyre dhe për të nxitur zhvillimin ekonomik.

Kurse grantet janë ndihmë e dhënë nga një organizëm qeveritar ose joqeveritar, në formën e transferimit, por që duhet plotësuar disa kushte të paracaktuara që lidhen me veprimtarinë e shfrytëzimit të kësaj njësie ekonomike.

Tahiri: Grantet, burim i keqpërdorimeve

Kryetari i Federatës Sindikale të Bujqve, Tahir Tahiri, thotë se keqpërdorimet në të shumtën e rasteve janë bërë në procesin e aprovimit të granteve, pasi vlera e mjeteve në këtë skemë ka qenë më e madhe.

“Te grantet ka pasur presion dhe kërkesa të mëdha. Për të fituar një grant, pjesa dërmuese e bujqve është dashur të japin 30 për qind të vlerës së projektit për të cilin kanë aplikuar. Nëse bujku ka aplikuar për 200 mijë euro, është dashur të japë 60 mijë euro për ta fituar projektin”, tha Tahiri.

Ahmetaj: Kam hequr dorë nga aplikimet për shkak të parregullsive
Një nga fermerët që ka aplikuar për pesë vjet radhazi për grante në Ministri të Bujqësisë është Bashkim Ahmetaj nga Komuna e Pejës, por asnjëherë nuk ka arritur që të përfitojë. Ahmetaj udhëheq fermën “Agro Ferma” dhe ka rreth 30 krerë lopë.

Ai vitet e fundit ka hequr dorë nga aplikimi, për shkak siç thotë Ahmetaj, parregullsive që kanë ekzistuar në Agjencinë për Zhvillimin e Bujqësisë.

“Unë kam hequr dorë sepse thoshin se duhet jap 10, 20 apo 30 për qind. Kështu që vendosa të mos aplikoj për grante edhe pse plotësoj kriteret e kërkuara. Nuk kam dashur të jap ryshfet paraprakisht”, tregon ai.

Pikërisht, për keqpërdorim të subvencioneve, marrjes së ryshfetit dhe keqpërdorim të detyrës zyrtare, Policia e Kosovës më 24 shkurt ka arrestuar 12 persona, në mesin e të cilëve dhjetë zyrtarë të Agjencisë për Zhvillimin e Bujqësisë, agjenci kjo që funksiononin në kuadër të Ministrisë së Bujqësisë në Kosovë. Gjatë bastisjes në shtëpitë e personave të arrestuar, sipas kryeprokurorit të Shtetit, Aleksandër Lumezi, janë sekuestruar deri në 400 mijë euro.

Gjykata Themelore në Prishtinë, të premten, më 26 shkurt, ka caktuar masën e paraburgimit prej një muaji për tetë nga zyrtarët, kurse për dy të tjerë është caktuar masa e arrestit shtëpiak.

Kurse më 25 shkurt, Policia e Kosovës ka arrestuar edhe nëntë persona në komuna të ndryshme të Kosovës, që lidhen me rastin e njohur si “Subvencioni 2021”. Sipas Policisë, “ekzistojnë dyshime të bazuara se personat e dyshuar përmes dhënies së ryshfetit kanë arritur që të marrin subvencione nga Ministria e Bujqësisë”.

Tahir Tahiri thotë se në rast se bujqit kanë shkuar dhe janë ankuar në Polici apo kanë dhënë prononcim për media, janë ndëshkuar nga zyrtarë e Ministrisë së Bujqësisë.

“Për ata (bujqit që kanë bërë publik aferat korruptive) janë gjetur forma të llojllojshme për të refuzuar aplikacionin për marrjen e granteve”, thotë ai.

Ndryshe, për të rritur interesimin e fermerëve për mbjelljen e sipërfaqeve më të mëdha me grurë apo kulturave tjera bujqësore, Ministria e Bujqësisë përmes programeve bujqësore, ka disa vite që subvencionon fermerët me nga 150 euro në vit, kurse sipërfaqja minimale e mbjellë me grurë duhet të jetë dy hektarë në pronësi të fermerit. Subvencione me vlera të ndryshme kryesisht ndahen për blegtori, perimtari, pemëtari, pylltari, shpezëtari, bletari dhe mbjellje pranverore dhe vjeshtor.

The post Grantet dhe subvencionet e gëlltitura nga zyrtarët e arrestuar të Ministrisë appeared first on Prizreni Sot.