Azemi: Ikja e të rinjve po vazhdon, punëtorët nga Bangladeshi po e shfrytëzojnë Kosovën si pikë tranzicioni
Kryetari i Sindikatës së Pavarur të Sektorit Privat të Kosovës, Jusuf Azemi, ka përmendur sërish mungesën e fuqisë punëtore në vend.
Ai në një konferencë për media ka thënë se ikja e të rinjve po vazhdon dhe se Qeveria nuk po bën asgjë. Madje, sipas tij, vetëm nga Bangladeshi kanë ardhur 500 punëtorë.
“Punëtorët tani po zgjedhin. Nuk është koha kur pronarët e kompanive kanë thënë se nëse dëshiron të punosh mirë, nëse jo tjetri është duke pritur te dera. Nga Qeveria e Kosovës nuk kemi asnjë lëvizje për rritjen e pagës minimale. Kosova tani për tani është një vend të cilin po e frekuentojnë punëtorët nga Bangladeshi. Deri tani rreth 500 punëtorë kanë ardhur deri tani. Këta nuk vijnë për të punuar, por Kosovën e shohin si pikë tranzicioni për ikje në Perëndim”, është shprehur Azemi.
Ai tutje ka folur edhe për kushtet e punës të punëtorëve në sektorin privat.
“S’kemi kontratë kolektive, s’kemi sigurime shëndetësore. S’po shohim perspektivë në vendin tonë për të punuar. Qeveria se ka bërë punën më të vogël për parandalim e ikjes se punëtorëve. S’po kemi dialog pothuajse fare si partnerë me Qeverinë e Kosovës. Gjithçka që kërkohet nga Sindikatat Qeveria e sheh si kërkese kundërshtuese”, shtoi Azemi.
